Kraḍ tmucuha n watmaten Grimm
Kraḍ tmucuha n watmaten Grimm yerratent-id Sεid At Mεemmer si talmant γer teqbaylit.
- Ḥmiṭuc d Duduc deg teẓgi n ṭṭlam (Hänsel et Gretel).
- M iγiγden (Cendrillon).
- Imeddaḥen n Tizi n Kulal
Ḥmiṭuc d Duduc deg teẓgi n ṭṭlam
Tella yiwet teẓgi n ṭṭlam seddaw taddart n at Weεban, win a tt-ikecmen deg uzal qayli, ad teccirew yakk ṣṣura-s, ad iḥulfu s ucebbub-is yuli deg igenni seg rrebrab tessekcam s ulawen. Dda Mira bu yesγaren, tameṭṭut-is Miγisa d warraw-nsen
Ḥmiṭuc d Duduc zedγen deg tlemmast-is.
Dda Mira yettarra-tt ḥala i unegzum n yesγaren, maca amzun ulac d acu yettsami deg-sen, seg wakken temcubbak akk teẓgi n ṭṭlam am wakken yal afurek yellan deg-s yesni γer wayeḍ.
Tawacult-agi n Dda Mira bu-yesγaren d taẓawalit almi d ayen, iεeggalen-is ur lḥiqen ara yakk iman-nsen, ula d aγrum aḥefrur ur teṛwin ara.
Yiwen wass ger wussan, akken d-tewweḍ tmeddit , yeẓẓel dda
Mira bu-yesγaren deg teγmert , yeṭṭef aqerruy-is yesnuzgum, yuγal yenna-yas i tmeṭṭut-is:
Amek ara nekkes tura laẓ i warrac-agi? Nekkni s timmad-nneγ ata yeṭṭeḍ-itt mmi-s, ur d-yegri kra n weεwin i s ara nemmager ussan xerṣum ad nessebded tigecrar-nneγ”.
Terray-as-d awal tmeṭṭut, tenna-yas: Teẓriḍ amek ! Tegra-d kan ad neglu yis-sen azekka s alqaε n teẓgi, a ten-nessiweḍ ḥala ma d anida ur s-ttafen ara yakk ixef-is i tuγalin, yal yiwen deg-sen a s-nekmes tiḥdert n weγrum s afus-is, mi tennesseγfel kan akken ur ttfaqen ara, ad asen-neğğ aḍu γer deffir. Dda Mira bu yesγaren: Ala a tameṭṭut, wagi d yir ttawil, ur zmireγ ara ad sseγreγ tasa-w fell-asen. Amek akka a n-ğğeγ arraw-iw deg welqaε n teẓgi, nekk a d-uγaleγ s axxam?
Miγisa: A ziγ kečč d timint ay axessar-iw! Ihi anef-as akka, a dterzu tmettant, a d-taf meqqar d acu ad teddem, ihi a γ-terfed deg ukkuẓ ( 4 ) yid-neγ γef yiwet tikkelt. Yelha wakka? Yeffeγ fell-ak wayagi?
Dda Mira bu yesγaren yeεfes γef wul-is iwufeq-itt.
Ḥmiṭuc d Duduc seg wakken ur ten-yeğği ara laẓ ad ṭṭ5sen,