MONTAIGNE, ESSAIS, DES CANNIBALES, I, 31 (30), Début.

« Quand le Roy Pyrrhus passa en Italie … elle ne merite pas d'estre nommée isle, pour cela. »

Editions : ~ Villey (P.U.F.), p. 202-203. ~ J. Céard et alii, Livre de poche, « La Pochothèque », 2001, p. 313-314 ~ Gallimard « La Pléiade » J. Balsamo, M. Magnien et Catherine Magnien -Simonin, 2007, p. 208 sqq. ~ Texte en ligne : http://www.bribes.org/trismegiste/es1ch30.htm

• TEXTE À EXPLIQUER :

[A] Quand le Roy Pyrrhus passa en Italie, apres qu'il eut recongneu l'ordonnance de l'armée que les Romains luy envoyoient au devant : Je ne sçay, dit-il, quels barbares sont ceux-cy (car les Grecs appelloyent ainsi toutes les nations estrangeres) mais la disposition de cette armée que je voy, n'est aucunement barbare. Autant en dirent les Grecs de celle que Flaminius fit passer en leur païs, [C] et Philippus voyant d'un tertre, l'ordre et distribution du camp Romain, en son Royaume, sous Publius Sulpicius Galba. [A] Voylà comment il se faut garder de s'attacher aux opinions vulgaires, et les faut juger par la voye de la raison, non par la voix commune.

J'ay eu long temps avec moy un homme qui avoit demeuré dix ou douze ans en cet autre monde qui a esté descouvert en nostre siecle, en l'endroit ou Vilegaignon print terre, qu'il surnomma la France Antartique. Cette descouverte d'un païs infini, semble estre de consideration. Je ne sçay si je me puis respondre que il ne s'en face à l'advenir quelqu'autre, tant de personnages plus grands que nous ayans esté trompez en cette-cy. J'ay peur que nous ayons les yeux plus grands que le ventre, et plus de curiosité, que nous n'avons de capacité. Nous embrassons tout, mais nous n'estreignons que du vent. Platon introduit Solon racontant avoir appris des Prestres de la ville de Saïs en Ægypte, que, jadis et avant le deluge, il y avoit une grande Isle nommée Athlantide, droict à la bouche du destroit de Gibaltar, qui tenoit plus de païs que l'Afrique et